Şırnak vilayətinin “müstəqilliyini” elan edən PKK-ya bağlı Demokratik Bölgələr Partiyasının bölgə rəhbərliyi həbs olunub. APA TV-nin məlumatına görə, DBP Şırnak təşkilatının sədri Salih Güvencin “artıq dövlət qurumları legitimliyini itirib, Şırnakın müstəqilliyini elan edirik” açıqlamasından bir neçə saat sonra polis partiya rəhbərlərinin evində axtarışa başlayıb. Bələdiyyə sədri Serhat Kadırhan, müavinləri Eylem Onuk və Murat Kabul, DBP yerli təşkilatının sədri Salih Güvencin də evi daxil olmaqla 10 evdə axtarış aparan polis 3  nəfəri həbs edib. Həbs olunanlar “müstəqillik” elan edən DBP-nin yerli təşkilatının rəhbər şəxsləridir. Bələdiyyə sədri və “müstəqillik bəyannaməsini” oxuyan Salih Güvenc evdə olmadıqları üçün onları həbs etmək mümkün olmayıb.