Bakıda internet klubunda dava olub, bir nəfər ağır xəsarət alıb. APA TV-nin məlumatına görə, gecə saatlarında 1 saylı Şəhər Kliniki Xəstəxanasına Binəqədi rayon sakini, 27 yaşlı Rasim Rafael oğlu Həsənov gətirilib. Ağır kəllə-beyin travması ilə daxil olan yaralı dərhal əməliyyat olunub. Onun vəziyyəti hələ də ağırdır.

 

Faktla bağlı Binəqədi Rayon Polis İdarəsinin 7-ci polis bölməsinə məlumat verilib. Müəyyən edilib ki, hadisə rayon ərazisində yerləşən 246 nömrəli məktəbin yaxınlığındakı internet klubunda baş verib. Naməlum şəxs Rasim Həsənova küt alətlə başından ağır xəsarət yetirib. Faktla bağlı araşdırma aparılır.