Bakının Sabunçu rayonunda yol qəzası baş verib, iki nəfər xəsarət alıb. APA-nın məlumatına görə, hadisə Zabrat qəsəbəsinin Babək küçəsində qeydə alınıb.

 

Toydan qayıdan İsmayıl Nəsibovun idarə etdiyi "Tofaş" markalı avtomobil işıqforun qırmızı işığında dayanan zaman "Shacman" markalı yük maşını ona arxadan çırpılıb. İsmayıl Nəsibovun dediyinə görə, qəzadan sonra yük maşınının sürücüsü hadisə yerindən qaçıb: "Vurdu, qaçıb getdi. İki nəfər xəsarət aldı. Təcili yardım apardı. Yanımdakı adam taksi ilə yük maşınının dalınca düşdü, tuta bilmədi, qaçdı".

 

Qəza zamanı avtomobildə olan iki sərnişin xəsarət alıb. Faktla əlaqədar Sabunçu Rayon Polis İdarəsində araşdırma aparılır.