Yüz illər tarixi olan Həcc ziyarətində bu il də izdiham yaşanır. İzdihamı elə Ciddə hava limanında olarkən müşahidə edirik. Həcc mərasimi işıqlandırmaq üçün Səudiyyə Ərəbistanının Mədəniyyət və İnformasiya Nazirliyi tərəfindən dünya ölkələrindən jurnalistlər dəvət olunub. Media üçün Ciddə şəhərində qərargah yaradılıb. Sübh tezdən Həcc yolçuluğu üçün hazırlığa başlayırıq. Əvvəlcə, Ümrə ziyarətini yerinə yetirəcəyik.

 

“Allahın hüzurundayıq. Bu gün biz burdayıqsa, deməli Allah bizi çağırıb. O, bizi mütləq eşidəcək”. Bu sözləri deyən Doha Tunisli jurnalistdir. Dəstəmaz alan zaman ehtiyatsızlıq etdi və ayağı qırıldı. Bir müddət arabada gəzməli olacaq. Ona bu ziyarətdən imtina etməsini təklif etsək də, razılaşmadı. Baş verənləri Allahın onu imtahana çəkməsi kimi qiymətləndirir.

 

Ehramlarımızı geyinirik. Qadın və kişi üçün ayrıca ehram var. Kişilər əyinlərində olan bütün geyimləri çıxararaq iki cüt dəsmaldan istifadə edir. Qadınlar isə onların bədənlərini göstərməyəcək istədikləri geyimi geyinə bilərlər. Daha çox ağ rəngə üstünlük  verirlər. “Ehram  miqat” adlandırılan Məkkənin 5  giriş nöqtələrindən birində niyyət edilir. Bu giriş nöqtələri Məhəmməd Peyğəmbər tərəfindən təyin olunub. Bura zəvvarlar üçün  Allahla görüş bölgəsinə gəlməyin xəbərçisi sayılır. Yəni, zəvvarlar illərcə gözlədiyi zaman və məkana gəliblər. Ehramda olan zaman bir çox qadağalar var. Ətirli qoxulardan istifadə etmək, qan çıxarmaq, saçından, dırnağından kəsmək qadağandır.

 

Hazırıq. Artıq dünyəvi geyimlər çıxarılıb, indi sadəcə insanlıq var. Sanki hər kəs ağ bayraq qaldırıb, təslim olduğunu göstərir, ölmədən ölümü yaşayır. Hər kəsdə bir həyəcan var.

 

Yol boyu təlbiyə demək vacibdir. Mənası isə belədir: "Buyur, Allahım, buyur! Əmrindəyəm, buyur. Sənin əsla ortağın yoxdur, Əmrindəyəm, buyur. Həmd sənə məxsusdur. Nemət də sənin, mülk də sənindir. Sənin əsla ortağın yoxdur".

 

Ziyarətçilərin çox olması səbəbindən Dohanın rahat hərəkət etməsi üçün gecəyə qədər gözləməli oluruq. Havanın temperaturu 30 dərəcədir. Günortaya nisbətən hava çox yaxşıdır.  Ancaq yenə də izdiham var.

 

Kəbə ətrafındayıq. Burada o qədər izdiham yaşanır ki, gecə saatları olmasına baxmayaraq insanlar Kəbədə təvaf edib, geri qayıdırlar. İnsan karvanı burada saatlarla davam edir.

 

Məkkə müsəlmanların ən sevimli şəhəri, Məhəmməd peyğəmbərin doğulduğu, peyğəmbərlik dövrünün çətin və ağır dönəminin 13 ilini keçirdiyi şəhərdir. Bu gün biz də daxil olmaqla bir çox müsəlmanların bura gəlməkdə məqsədi Həcc əməllərini yerinə yetirməkdir.

 

Və budur Kəbənin bir addımlığındayıq. Kəbədə təvaf Həcər-il-Əsvad adlanan yerdən başlanılır. Bu, Kəbənin divarındakı qara və parlaq daşdır. Həcc ziyarətində zəvvarlar 50 santimetr olan bu daşı sağ əlini qaldıraraq salamlayır və təvafa başlayırlar. Yeddi dəfə dövr etdikdən sonra dayanırıq.

 

Kəbə. müsəlmanların gündə 5 dəfə yönəldiyi məkan. Milyonlarca insan təvaf edir. Biz də onlardan biri olduğumuz üçün çox şanslıyıq.

 

Burada insan axını heç vaxt kəsilmir. Gecə və gündüz, istənilən vaxt burada insan görmək olar. Yalnız namaz vaxtlarında müsəlmanlar ayaq saxlayır və səcdə edir. Ölkələri, mədəniyyətləri, irqləri fərqli olsa da, bütün müsəlmanlar eyni inanc və duyğu içərisində yorulmadan  addımlayırlar.

 

Həcc nədir? O, elə bir şeydir ki, sən bunu mütləq etməlisən. Bu, ən yaxşı yoldur. Sən yenidən doğulursan.

 

Günahlarımızın bağışlanması, dualarımızın qəbul olunması üçün Allahın bizə verdiyi bir şansdır.

 

Müsəlmanlara səbir, sevgi, qayğı, dostluq, fədakarlıq kimi əxlaqi gözəllikləri qazanmaq imkanı verir, gələcəyimiz üçün bir yol cızır.

 

Növbəti məkan Səfa və Mərvə təpələridir.  Bu təpələr arasında məsafə  400 metrdir.  İki təpənin arası əvvəllər açıq olsa da, indi bağlı və sərin yer şəkilinə gəlib. Həcc ziyarətinə gələn hər kəs burada mütləq yeddi dəfə o baş bu başa gedib gəlməlidir. Rəvayətə görə, Həzrəti İbrahimin xanımı Həzrəti Həcər oğlu İsmayılla burada kimsəsiz buraxılıbmış. İsti havada oğlunun susuz qalmasından qorxan Həzrəti Həcər bu iki təpə arasında qaçıb, su axtarırmış. Həmin vaxt İsmayılın ayağı altından su fışqırıb. Zəmzəm suyu. Müsəlmanların sevə-sevə içdiyi Zəmzəm. İndi zəvvarlar da Həzrəti Həcər kimi iki təpə arasında say edirlər. Yaşıl işıq yanan ərazidə kişilər yüyürərək keçməlidir. Yorğunluğumuzu Zəmzəm suyu içməklə çıxarırıq.

 

Burada havalar isti keçdiyi üçün ərazi boyunca Zəmzəm suları qoyulub, su kranlardan axır, ya da xüsusi qablara doldurularaq qoyulub. Səfa və Mərvə təpələri arasında say edən zəvvarlar susuzluqlarını yatırmaq üçün Zəmzəm suyundan içirlər.

 

Sonda saç və dırnaqdan kəsməklə Ümrə ziyarətimizi başa vururuq. Kəbənin yerləşdiyi əl-Hərəm məscidindəyik. Dünyanın ən böyük məscidi olan Əl-Hərəmdə eyni vaxtda 1.5 milyon insan ibadət edə bilir. Namaz qılmaq üçün zəvvarlar elə burada gecələyirlər. Səhər namazına yetişmək üçün isə onlar bir neçə saat əvvəldən yola çıxırlar. Çünki izdiham o qədər olur ki, namaz vaxtına yetişmək çətin olur. Məscidin genişləndirilməsi prosesi davam edir. Kəbənin dörd tərəfində qaldırıcı kranlar var. Təəssüf ki, bu quruculuq işləri 107 zəvvarın ölümü ilə nəticələnib.

 

Məsciddən uzaqlaşırıq. Qarşıdakı gündə isə bizi daha ağır sınaq gözləyir - cəhənnəm istisi Ərəfat!