Milli Məclisin növbəti plenar iclası keçirilib. APA TV-nin məlumatına görə, iclasda İnzibati Xətalar Məcəlləsinə dəyişiklik edilməsi barədə məsələ müzakirəyə çıxarılıb.

 

Layihə barədə məlumat verən deputat Rəfael Cəbrayılov deyib ki, bundan sonra Azərbaycanda inzibatı xəta törətmiş bəzi narkomanlar məcburi müalicə olunacaqlar.

 

Məcburi müalicə müvafiq icra hakimiyyəti orqanının tabeliyində olan ixtisaslaşdırılmış tibb müəssisəsində aparılacaq. Narkomanların məcburi müalicədən vaxtından əvvəl azad edilməsi və onların məcburi müalicə müddətinin uzadılması həmin müəssisənin müdiriyyətinin təqdimatı və həkim-məsləhət komissiyasının rəyi nəzərə alınmaqla həyata keçiriləcək.

 

İclasda "Polis haqqında” qanuna dəyişiklik də müzakirəyə çıxarılıb. Yeni əlavə edilən bəndə əsasən kütləvi idman tədbirlərinin və idman yarışlarının keçirilməsi zamanı idman obyektlərində, tamaşaçılar üçün nəzərdə tutulmuş yerlərdə, eləcə də idman obyektlərinə bitişik ərazilərdə və təxliyə yollarında zorakılığın qarşısını almaq, yarış iştirakçılarının və tamaşaçıların təhlükəsizliyini və ictimai asayişi təmin etmək də polis əməkdaşının vəzifəsi olacaq. Dəyişiklik səsə qoyularaq qəbul edilib.

 

“Dini etiqad azadlığı haqqında” qanuna dəyişikliklərlə bağlı aparılan müzakirə zamanı millət vəkili Qüdrət Həsənquliyev deyib ki, dini təşkilatlardan ikisi parlament seçkilərini boykot edəcəyini bəyan edib. Dini Qurumlarla İş üzrə Dövlət Komitəsi bununla bağlı Ədliyyə Nazirliyinə müraciət etməli və həmin dini təşkilatların qeydiyyatı ləğv olunmalıdır: "Dövlət Komitəsinə qanunla belə dini təşkilatların qeydiyyatını ləğv etmək səlahiyyəti verilməlidir".

 

Milli Məclis "Özəl tibb fəaliyyəti haqqında" qanuna dəyişiklikləri də müzakirəyə çıxarıb. Komitə sədri Hadı Rəcəbli bildirib ki, dəyişikliyə görə, tibb fəaliyyəti ilə məşğul olan şəxslər tərəfindən özəl tibb fəaliyyəti sahəsində onlara verilmiş xüsusi razılıqda (lisenziya) göstərilən işlər və xidmətlərdən kənar (ilkin tibbi yardım istisna olmaqla) tibb fəaliyyətinin həyata keçirilməsinə yol verilmir.

 

Dəyişiklik səsə qoyularaq qəbul edilib.

 

İclasda  “Azərbaycan Respublikasının “Tərəqqi” medalının Əsasnaməsinin və təsvirinin təsdiq edilməsi haqqında” qanuna dəyişiklik edilməsi barədə” qanun layihəsi müzakirəyə çıxarılıb. Dəyişikliyə əsasən, “Tərəqqi” medalının hüquq sahələrində xidmətlərə görə də verilməsi nəzərdə tutulur.