Ordunun gücü yazlnız silahda, hərbi texnikada deyil, həm də əsgərin öz dövlətinə, xalqına inamındadır. Bu baxımdan cəmiyyətlə ordu arasında əlaqələrin qurulması, əsgərin özünü yalnız ordunun deyil, cəmiyyətin, vətənin, dövlətin bir hissəsi kimi hiss eləməsi vacib amildir.

 

Əsgərlərimiz, zabitlərimiz bilməlidir ki, onlar tək deyillər, vəzifəsindən, tutduğu mövqeyindən asılı olmayaraq hər bir Azərbaycan vətəndaşı həmişə onların yanındadır, onlara dəstəkdir.

 

Bakı Şəhər Gənclər və İdman Baş İdarəsinin və “Silahlı Qüvvələrə İctimai Nəzarət” İctimai Birliyinin təşkilatçılığı ilə həyata keçirilən səfər də məhz bu mühüm məqsədə xidmət edirdi.

 

Qonaqlar əvvəlcə Gəncə şəhərindəki “N” saylı hərbi hissədə olublar. Səfərin əsas məqsədi orduya ictimai nəzarətin yaranmasına dəstək olmaq, Azərbaycanı idmanın müxtəlif növləri üzrə dünya və Avropa çemionatlarında təmsil edən idmançılarla, həmçinin KİV və QHT nümayəndələri ilə əsgərlərin görüşünü təşkil etmək idi. Qeyd edək ki, hərbçilərlə görüşdə yeniyetmələr arasında boks üzrə Avropa çempionu Ruslan Rüstəmov, Bakıda keçirilən I Avropa Oyunlarının qızıl mükafatçısı Ayxan Mamayev və I Avropa Oyunlarının gümüş mükafatçısı Amil Qasımov da iştirak edib.

 

Tədbirin rəsmi hissəsinin açılışında çıxış edən Bakı şəhər Gənclər və İdman Baş İdarəsinin rəisi Raqif Abbasov hərbi hissədə keçirilən bu tədbirin hər il ənənəvi olaraq təşkil olunduğunu bildirib: "Bu tədbirlərin ordumuz, əgər-zabitlərimiz üçün böyük əhəmiyyəti var. Hərbçilərimiz bilsinlər ki, həmişə onların yanındayıq. Bu gün Cənab Prezidentin, Silahlı Qüvvələrimizin Ali Baş Komandanı cənab İlham Əliyevin ordumuza diqqəti və qayğısı sayəsində Azərbaycan Ordusu bölgənin ən güclü ordusu olaraq formalaşıb. Biz də çalışmalıyıq ki, ordu quruculuğuna öz töhfəmizi verək".

 

“Silahlı Qüvvələrə İctimai Nəzarət” İctimai Birliyinin sədri Emil Həsənli də bu kimi tədbirlərin Ordumuzda ruh yüksəkliyinin artırılmasında xüsusi əhəmiyyətini qeyd edib: "İndi hamımız - cəmiyyətdə tutduğu mövqedən asılı olmayaraq hər kəs ordumuzun daha qüvvətlənməsi üçün əlindən gələni etməlidir".

 

Çıxışlardan sonra hərbi xidmətdə fərqlənən zabitlər, gizirlər və əsgərlər Baş İdarə tərəfindən diplomlar və qiymətli hədiyyələrlə təltif olundular. Bundan sonra isə tədbirin bədii hissəsinə start verildi. Gəncə şəhərinin tanınmış mədəniyyət və incəsənət xadimlərinin, musiqiçilərin səsləndirdikləri ifaların sədası altında Bakıdan gələn qonaqlar hərbçilərlə birlikdə oynayıb, və onlara öz xeyr-dualarını çatdırıblar.

 

Sonra qonaqlar hərbi hissədə vəziyyətlə tanış olub və hərbçilərimizlə birlikdə nahar ediblər.

 

Bundan sonra tədbirin təşkilatçıları cəbhə bölgəsində yerləşən Murovdakı hərbi hissələrimizdən birinə gənc əsgərlərlə görüşməyə yollanıblar.

 

Bəli, bura Murovun ətəyidir, təbii şərait baxımından ən çətin döyüş mövqelərimizdəndir. Ancaq burada - dağların əhatəsində yaradılan şərait heç də şəhərdə yerləşən hərbi hissələrdə yaradılan şəraitdən geri qalmır. Burada da zabit-əsgər heyəti ilə görüş keçirilib, hərbi xidmətdə fərqlənən zabitlər, gizirlər və əsgərlər Bakı Şəhər Gənclər və İdman Baş İdarəsi tərəfindən diplomlar və qiymətli hədiyyələrlə təltif olunublar.

 

Azərbaycan Prezidenti, Silahlı Qüvvələrin Ali Baş Komandanı İlham Əliyevin Ordumuzun inkişafına həmişə xüsusi diqqət yetirdiyi heç kəs üçün sirr deyil. Ali Baş Komandan dəfələrlə qeyd edib ki, Azərbaycan ordusu Cənubi Qafqazın ən böyük qüvvəsidir və Ordunun daha da inkişaf etməsi üçün bütün lazımi tədbirlər görülür. Biz də bu qısamüddətli səfərdən sonra cənab Ali Baş Komandanın Azərbaycan Ordusuna inamının, diqqətinin nə qədər yüksək olduğuna bir şahid olduq. Bu inam və diqqətin, həmçinin səfərdə gördüklərimizin sayəsində işğal olunmuş torpaqlarımızın düşmən tapdağından azad ediləcəyi günün o qədər də uzaq olmadığına bir daha inandıq.