IDEA İctimai Birliyi, “ASAN Xidmət” və "Azersun Holding"in birgə təşkilatçılığı ilə kağız tullantıların toplanmasına həsr olunmuş “Hər kağızı bir yarpağa dəyişək” layihəsi çərçivəsində “Yaşıl dağ” sosial aksiyası keçirilib.

 

APA TV-nin məlumatına görə, kağız tullantıların bir yerə toplanması ilə dağ düzəldilməsi nəzərdə tutulan aksiyada simvolik yaradılan “dağ” sosial məsuliyyəti anlayan bir qrup insanı bir yerə toplayıb və ”yaşıl” gələcək üçün çağırış edib.

 

Tədbirdə çıxış edən Vətəndaşlara Xidmət və Sosial İnnovasiyalar üzrə Dövlət Agentliyinin sədri İnam Kərimov bildirib ki, layihəyə dəstək məqsədilə “ASAN Xidmət” mərkəzlərində ASAN Könüllüləri tərəfindən “Yaşıl ASAN” təşəbbüsü irəli sürülüb və yüzlərlə gənc bu təşəbbüsün iştirakçısına çevrilib.

 

Ombudsman Elmira Süleymanova bildirib ki, bu, ekologiyanı qorumaq üçün mühüm addımdır.

 

Aksiyanın ilk saatlarından aktivlik müşahidə olunub. Aksiyada iştirak etmək istəyən şəxslər özü ilə birlikdə ən azı 5 kq kağız tullantı gətirərək aksiyaya qoşula bilərlər. Ancaq müxtəlif çəkidə kağız təqdim edənlər də olub.

 

Qeyd edək ki, “Hər kağızı bir yarpağa dəyişək” layihəsinin məqsədi kağız israfını azaltmaq və təkrar emalı təşviq etmək yolu ilə ağacların qorunmasına, təbiətin mühafizəsinə və ekoloji balansın saxlanılmasına nail olmaqdır. Layihə həmçinin ətraf mühitin çirklənməsinin qarşısını almaq və tullantıların düzgün idarə olunmasını təşviq etməyi hədəfləyir.