"Axşam saat  8-də evdən çıxıb zəngləşib, görüşüb gedirdik Ramana qəsəbəsindəki məhəllə evlərinə. Hansısa evdə işıq yanmırsa, o evə daş atırdıq. Səsə çıxan olmayanda evə girib oğurluq edirdik. Telefon, televizor, noutbuk - əlimizə nə keçsə, götürürdük".

 

Bu şəxs  paytaxtın Sabunçu, Suraxanı və Xətai rayonlarında yerləşən yaşayış evlərindən oğurluq etməkdə şübhəli bilinən Hümbət Mirzəyevdir. Onun sözlərinə görə, qrup halında girdikləri evlərdən pula dəyər nə varsa aparıblar.

 

Bakı Şəhər Baş Polis İdarəsindən APA TV-yə verilən məlumata görə, keçirilən əməliyyat-axtarış tədbirləri nəticəsində paytaxtın Sabunçu, Suraxanı və Xətai rayonlarında yerləşən yaşayış evlərindən oğurluq etməkdə şübhəli bilinən Ağcabədi rayon sakini, əvvəllər məhkum olunan, 1983-cü il təvəllüdlü Elməddin Eyvaz oğlu Mirzai, Ağdam rayon sakini, 1992-ci il təvəllüdlü Hümbət Aqil oğlu Mirzəyev, Bakı şəhər sakini, 1990-cı il təvəllüdlü Elmin Firdovsi oğlu Həsənov müəyyən olunaraq tutulublar.

 

Şübhəli şəxslər ətrafında keçirilən ilkin istintaq, əməliyyat-axtarış tədbirləri ilə müəyyən olunub ki, onlar avqustun 16-da axşam saatlarında Sabunçu rayonu Bakıxanov qəsəbəsinin Y.Əliyev küçəsində Natella Ağamirzəyevanın evindən pəncərənin dəmir barmaqlığını sındırmaqla 400 manat, noutbuk, planşet və 2 ədəd qol saatı, eyni üsulla sentyabrın 15-də gecə saatlarında Xətai rayonu Pivəzavod küçəsində Davud Həmidovun evindən 500 ABŞ dollar, 1250 Türkiyə lirəsi, qızıl-zinət əşyaları, sentyabrın 19-da Bülbülə qəsəbəsində Gövhər Əliyevanın evindən açıq pəncərədən keçməklə noutbuk və qızıl-zinət əşyalarını talayıblar. O da müəyyən olunub ki, dəstə üzvləri sentyabrın 19-da gündüz saatlarında Bülbülə qəsəbəsində Nadir Bağırovun evindən açıq pəncərədən keçməklə oğurluğa cəhd ediblər.

 

Elməddin Mirzai: "Getdik oğurluğa, mən durdum çöldə, onlar girdi içəri. Əşyaları çıxardı, çıxıb gəldik. Noutbuk, telefon və zinət əşyaları götürmüşdülər".

 

Elmin Həsənov: "Məqsədimiz girdiyimiz mənzillərdən pul götürmək olub. Bir evə girdim, oradan bir televizor götürdüm. Zığ qəsəbəsində girdiyim evdən 400 dollar və 1200 türk lirəsi pul götürmüşəm".

 

Şübhəli şəxslər barəsində Cinayət Məcəlləsinin müvafiq maddələri ilə cinayət işi başlanıb. Hazırda cinayət işi üzrə istintaq tədbirləri davam etdirilir.