Azərbaycan prezidenti İlham Əliyev oktyabrın 6-da Ucar rayonuna səfərə edib. APA TV-nin məlumatına görə, dövlət başçısı əvvəlcə Ucarın mərkəzində  Heydər Əliyevin abidəsi önünə gül dəstəsi qoyub. Ucar rayon icra hakimiyyətinin başçısı Mənsur Məmmədov abidənin ətrafında görülmüş işlər barədə prezidentə məlumat verib.

 

Prezident Ucar rayonuna səfəri çərçivəsində “Ucar Aqro” MMC-nin quş kəsimi və broyler fabriklərinin fəaliyyəti ilə tanış olub. Fabriklərin inşasının 1-ci mərhələsinin dəyəri 28.4 milyon manat olub. Prezident İlham Əliyev fabrikin işçiləri ilə görüşüb söhbət edərək xatirə şəkli çəkdirib.

 

Ölkə başçısı “Fermer” yol-istirahət mərkəzində yaradılan şəraitlə də tanış olub, Ucar Mərkəzi Rayon Xəstəxanasının yeni binasının açılışında iştirak edib. Dövlət  başçısı xəstəxananın rəmzi açılışını bildirən lenti kəsib.

 

Azərbaycan prezidentinə aparılan tikinti işləri barədə ətraflı məlumat verilib. Prezident İlham Əliyev tibb ocağında yaradılan şəraitlə tanış olub. Xəstəxana 118 çarpayılıqdır. Burada 340 tibb işçisi çalışacaq. Onların 80-i həkimdir.

 

Prezidenti İlham Əliyev Ucar Gənclər Mərkəzinin açılışında da iştirak edib. Dövlət başçısına məlumat verilib ki, ərazisi 2 min kvadratmetr olan Ucar Gənclər Mərkəzi respublikada ən böyük gənclər mərkəzlərindən biridir. Prezident mərkəzin rəmzi açılışını bildirən lenti kəsib.

 

Dövlət başçısı daha sonra  Yeni Azərbaycan Partiyasının rayon təşkilatının yeni inzibati binasının açılışında iştirak edib. Prezident  binanın rəmzi açılışını bildirən lenti kəsib.

 

Prezident İlham Əliyev Ucar Tarix-Diyarşünaslıq Muzeyi üçün inşa olunan yeni binanın açılışında iştirak edib. Dövlət başçısı muzeyin yeni binasının rəmzi açılışını bildirən lenti kəsib. Prezident İlham Əliyevə məlumat verilib ki, ümumi sahəsi 650 kvadratmetr olan bina bütün lazımi kommunikasiya xətləri və müvafiq avadanlıqla təchiz olunub.

 

Prezident daha sonra Ucar şəhərinin su təchizatı sisteminin yenidən qurulması layihəsinin başa çatdırılması münasibətilə təşkil olunan mərasimdə iştirak edib. “Azərsu” Açıq Səhmdar Cəmiyyətinin prezidenti Qorxmaz Hüseynov dövlət başçısına məlumat verib ki, regionların sosial-iqtisadi inkişafı Dövlət Proqramı çərçivəsində bölgələrdə əhalinin içməli su təchizatının yaxşılaşdırılması istiqamətində tədbirlər davam etdirilir. Prezident İlham Əliyev idarənin binasında yaradılmış şəraitlə tanış olub.

 

Sonra prezident İlham Əliyev şəbəkəyə suyun verilməsini bildirən düyməni basıb.

 

Prezident yenidən qurulan Göyçay-Ucar avtomobil yolunun açılışında da iştirak edib. “Azəryolservis” ASC-nin sədr əvəzi Saleh Məmmədov dövlət başçısına Göyçay-Ucar avtomobil yolunun yenidən qurulması layihəsi çərçivəsində görülən işlər barədə məlumat verib. Dövlət başçısı yolun rəmzi açılışını bildirən lenti kəsib.