Azərbaycanın Cəlilabad rayonunda fərdi evdə partlayışla müşaiyət olunan yanğın baş verib.

 

APA TV-nin cənub bürosunun məlumatına görə, hadisə oktyabrın 6-da saat 17.00 radələrində rayonun Uzuntəpə kənd sakini Valeh İsaxan oğlu Sadıqova məxsus birmərtəbəli fərdi yaşayış evində qeydə alınıb.

 

Yanğın baş verən zaman evdə yol tikintisində çalışan 10 nəfərə yaxın fəhlə istirahət edirmiş.

 

Hadisədən dərhal sonra onlar evdən bayıra çıxmağa cəhd göstərsələr də, fəhlələrdən 4 nəfəri müxtəlif dərəcəli yanıq xəsarətləri alaraq Cəlilabad Mərkəzi Rayon Xəstəxanasına yerləşdirilib.

 

Yanğın barədə Fövqəladə Hallar Nazirliyinin Cəlilabad Rayon Yanğından Mühafizə Hissəsinə məlumat daxil olan kimi hadisə yerinə 3 yanğınsöndürən maşın və xeyli sayda canlı  qüvvə  cəlb olunub. Onların səyləri ilə 3 otaq və 2 eyvandan ibarət evin müəyyən hissəsi qismən yanğından mühafizə olunub. Evin qalan hissəsi isə içindəki əşyalarla birlikdə yanaraq yararsız vəziyyətə düşüb.

 

İlkin versiya kimi yanğına elektriklə işləyən məişət cihazlarından birində baş verən qısaqapanmanın səbəb olduğu bildirilir.

 

Faktla bağlı araşdırma aparılır.