Daxili İşlər Nazirliyi Baş Mütəşəkkil Cinayətkarlıqla Mübarizə İdarəsinin əməkdaşlarının həyata keçirdiyi əməliyyat nəticəsində narkotik maddələrin qanunsuz dövriyyəsi ilə məşğul olan Şirvan şəhər sakini Səbuhi Məmmədov, həmçinin Hacıqabul rayon sakinləri - Güləhməd Mirzəyev və Natiq Kazımov saxlanılıb.

 

APA TV-nin məlumatına görə, keçirilən tədbirlərlə onların Gülnar adlı şəxs vasitəsilə barələrində rüsvayedici videolar yayacaqları hədəsi ilə bir neçə vətəndaşdan külli miqdarda pul almaları müəyyən edilib. Əməliyyat tədbirlərinin davamı olaraq Baş İdarə əməkdaşları tərəfindən Şirvan şəhər sakini Gülnar Əhmədova da tutularaq istintaqa cəlb edilib.

 

Saxlanılan Natiq Kazımov törətdikləri cinayətləri etiraf edib: "Şirvan şəhərində bir neçə vətəndaşı hədələmişik. Çünki onlar barəsində əlimizdə rüsvayedici materiallar var idi. O materialları yaymamaq üçün onları hədələyib pul almışıq".

 

Faktla bağlı Baş İdarənin İstintaq Şöbəsində cinayət işi başlanıb, araşdırmalar davam etdirilir.

 

Qeyd edək ki, gördüyünüz dəstə üzvlərinin cinayət əməllərindən zərərçəkən başqa şəxslər varsa, bu barədə aidiyyəti üzrə polis orqanlarına və ya 012-590-66-58 nömrəsinə zəng edərək məlumat verə bilərlər.