Nərimanov rayonunda sərxoş sürücü zəncirvarı qəza törədib. APA TV-nin məlumatına görə, hadisə Atatürk prospektində baş verib.

 

"Mercedes" markalı iki avtomobil işıqforun qırmızı işığında dayanan zaman sürətlə hərəkət edən "Land Rover" markalı avtomobil "Mercedes"lərdən birini arxadan vurub. O isə qarşıda dayanan eyni markalı avtomobilə çırpılıb. Hadisə zamanı iki maşının arasında qalan "Mercedes"in sürücüsü Samir Səmədov və sərnişini Anar Hüseynli xəsarətlər alıblar. Onlar hadisə yerinə çağırılan təcili tibbi yardın avtomobili ilə xəstəxanaya aparılıblar.

 

Qəza yerinə yol polis əməkdaşları gəliblər. Yoxlama zamanı məlum olub ki, "Land Rover"in sürücüsü Elyas Qasımov avtomobili sərxoş vəziyyətdə idarə edib. Sərxoş sürücü qəzadan sonra avtomobili ilə hadisə yerini tərk etmək istəyib. Lakin avtomobil işə düşməyib.

 

Sərxoş sürücü Elyas Qasımov barəsində protokol tərtib olunub. Qəzanın dəqiq səbəbləri isə təyin olunan avtotexniki ekspertizanın rəyindən sonra bəlli olacaq.