Kürdəmirdə baş verən qəzada sürücü xəsarət alıb. APA TV-nın yerli bürosunun xəbərinə görə, hadisə Ağsu-Kürdəmir-İmişli yolunun 46-cı kilometrliyində qeydə alınıb.

 

Kürdəmir rayonunun Muğanlı kənd sakini, 26 yaşlı Əliyar Sabir oğlu Nuruyev idarə etdiyi "Ka-700" markalı traktorun idarəetməsini itirərək yolun kənarına aşırıb.

 

Traktorda sıxılmış vəziyyətdə qalan sürücünü Fövqəladə Hallar Nazirliyinin əməkdaşları xüsusi alət və avadanlıqların köməyi ilə çıxarıblar. Sürücü Əliyar Nuruyev müxtəlif bədən xəsarətləri ilə Kürdəmir Mərkəzi Rayon Xəstəxanasına yerləşdirilib.

 

Faktla bağlı araşdırma aparılır.