Fövqəladə Hallar Nazirliyinin 10 illik yubileyi münasibətilə “Fövqəladə hallar və təhlükəsiz həyat” mövzusunda beynəlxalq elmi konfrans keçirilib.

 

APA TV-nin məlumatına görə, tədbir Xəzər dənizində baş verən faciə qurbanlarının xatirəsinin 1 dəqiqəlik sükutla yad edilməsi ilə başlanıb.

 

Konfransda Rusiya, Belarus, Ukrayna və Qazaxıstan Fövqəladə Hallar nazirlikləri və akademiyalarının nümayəndələri iştirak ediblər.

 

Fövqəladə hallar nazirinin müavini, tibb xidməti general-leytenantı Faiq Tağızadə bildirib ki, FHN-nin yaradılmasında əsas məqsəd Heydər Əliyevin də dediyi kimi fövqəladə halların qarşısını öncədən almaq, nəticələri aradan qaldırmaq olub.

 

Yusif Məmmədəliyev adına Neft-Kimya Prosesləri İnstitutunun direktoru akademik Vaqif Abbasov deyib ki, FHN uğurlu fəaliyyət göstərir: “Son qəza zamanı neftçilərin xilas edilməsində, platformanın hələ də istismara yararlı qalmasında FHN-nin rolunu qeyd etmək lazımdır”.

 

AMEA Coğrafiya İnstitutunun direktoru, akademik Ramiz Məmmədov  bildirib ki, dənizə düşən neftin 40 faizi buxarlanır. Onun sözlərinə görə, Xəzərdə küləklərlə bağlı çirklənmə ilə əlaqədar Azərbaycan akvatoriyası, sahilləri təhlükəli ərazidir.

 

O bildirib ki, sonuncu qəza baş verən platformanın ətrafında da neft ləkələri olub: "Bu bir siqnal idi ki, tədbir görmək lazımdır".  R. Məmmədov bildirib ki, hadisə yerinə xilasetmə gəmiləri ilə yanaşı, neft dağılmaları ilə bağlı gəmilər də cəlb olunmalıdır. Akademik qeyd edib ki, heç kim qəzadan sığortalanmayıb, ona görə də əsas məsələlərdən biri neft dağılmalarının modelləşdirilməsidir.

 

Konfransda çıxış edən AMEA Respublika Seysmoloji Xidmət Mərkəzinin rəhbəri Qurban Yetirmişli mərkəzlə FHN-nin səmərəli əməkdaşlıq etdiyini bildirib: "Bakıda Bayıl sürüşməsi, Zaqatala və Balakəndə baş vermiş zəlzələlər zamanı, sentyabrın 4-də Şəkidə baş verən zəlzələ zamanı Fövqəladə Hallar Nazirliyi ilə  əməkdaşlıq etmişik. Fövqəladə Hallar  Nazirliyi əməkdaşlarının zəlzələ baş verən zaman operativliyi, insanları qəzalı vəziyyətdə olan evlərdən təxliyə etmələri mənim yaxşı yadımdadır və bu, əməkdaşların peşəkarlığının göstəricisidir”. 

 

Konfransda maarifləndirmə işinin təşkili ilə bağlı sualları cavablandıran fövqəladə hallar nazirinin müavini Faiq Tağızadə deyib ki, "Günəşli"dəki platformalarda və digər platformalarda da mütəmadi təlimlərin keçirilməsinə ehtiyac olub: "Gərək bu cür yerlərin hamısında mütəmadi təlimlər keçirilsin ki, neftçilər belə hal baş verəndə təlaşa düşməsinlər. Digər tərəfdən, ümumilikdə götürdükdə, ARDNŞ-də, yerlərdə rəhbərlik məcbur etsin ki, təlimlər keçirilsin. Yəni insanlarda refleks olsun ki, belə hadisələrdə nələr edilməli, nələrsə edilməməlidir. Platformada baş verən hadisə zamanı da neftçilər edilməməli olan hərəkəti ediblər, nəticədə belə hadisə baş verib”. 

 

Konfrans çıxışlarla davam edib.