Türkiyənin Cənub-Şərqində PKK terror təşkilatına qarşı hərbi əməliyyatlara etiraz edənlər yenidən Diyarbəkirdə küçələrə çıxıblar.

 

APA TV-nin məlumatına görə,  bələdiyyə binasının qarşısına yığışan aksiya iştirakçılarına polis sərt müdaxilə edib. Polisə qarşılıq verən aksiya iştirakçılarını dağıtmaq üçün su şırnaqları və bibər qazından istifadə edilib.

 

Daha sonra şəhərin ayrı-ayrı yerlərinə dağılan qruplar yol kəsərək barrikadalar qurublar. Təkər yandıran aksiya iştirakçılarına polis müdaxilə etsə də, onlar dağılışmayıblar.

 

Digər yandan PKK terror təşkilatı Şırnakda zirehli hərbi texnikanı vurub. Nəticədə iki polis əməkdaşı yaralanıb, biri isə xəstəxanaya aparılarkən yolda keçinib.

 

Məlumat üçün bildirək ki, Türkiyənin Cənub-Şərqində terror təşkilatı PKK-ya qarşı hərbi əməliyyatlar davam edir. 6 gündür Cizrə və Silopidə davam edən əməliyyatlarda 87 terrorçu öldürülüb. Diyarbəkirin Sur qəsəbəsində 24 gündür davam edən əməliyyat zamanı isə 36 terrorist öldürülüb.