"Azərbaycanda miqrantların yaşayışı üçün yaradılan şəraiti müsbət qiymətləndirirəm".

 

APA TV-nin məlumatına görə, bunu BMT-nin Qaçqınlar üzrə Ali Komissarlığının Azərbaycandakı ofisinin nümayəndəsi Daq Siqurdson Dövlət Miqrasiya Xidmətinin qaçqın statusunun müəyyənləşdirilməsi prosesində iştirak edən əməkdaşları üçün keçirilən təlimdə bildirdi. BMT nümayəndəsinin sözlərinə görə, ölkəmizdə bu istiqamətdə görülən işlər təqdirə layiq olsa da, bir sıra boşluqlarda mövcuddur. Bunun üçün BMT-nin Qaçqınlar üzrə Ali Komissarlığı Dövlət Miqrasiya Xidmətinin əməkdaşlarına 3 günlük təlim keçməyi məqsədə uyğun hesab edir.

 

Keçirilən təlimin məqsədi qaçqınların və sığınacaq axtaran şəxslərin himayəsini gücləndirmək məqsədilə milli qaçqın statusunun müəyyənləşdirilməsi prosedurlarının keyfiyyətinin yaxşılaşdırılması üçün DMX-nin işçi heyətinin bacarıqlarını artırmaqdır. Təlimdə Qaçqın Statusunun Müəyyənləşdirilməsi idarəsinin rəisi Nazim Salmanov, Avropa İttifaqının Əməliyyatlar şöbəsinin nümayəndəsi Nikolay Bekasyak çıxış edib.

 

Qeyd edək ki, Azərbaycan 2013-cü ilin aprel ayında fəaliyyətə başlayan Şərqi Avropa və Cənubi Qafqazda Sığınacaq Sistemlərinin Keyfiyyət Təşəbbüsü layihəsində iştirak edən altı ölkədən biridir. İki illik layihə Avropa İttifaqı və BMT QAK tərəfindən birgə maliyyələşdirilərək BMT QAK tərəfindən həyata keçirilir və altı ölkədə sığınacaq prosedurları və qaçqınların himayəsini yaxşılaşdırmağa yönəlib. Azərbaycanla yanaşı, layihə Ermənistan, Belarus, Gürcüstan, Moldova və Ukraynanı da əhatə edir.