Türkiyədə qeydə alınmış “donuz qripi” təhlükəsi ilə bağlı Azərbaycanın gömrük keçid-məntəqələri gücləndirilmiş iş rejiminə keçib.

 

APA TV-nin cənub bürosunun məlumatına görə, bunu Masallıda jurnalistlərə açıqlamasında Dövlət Gömrük Komitəsinin sədri Aydın Əliyev deyib.

 

O bildirib ki, istər “donuz qripi”, istərsə də “quş qripi”nin əsas əlamətləri qızdırma simptomudur. Ona görə də bütün sərhəd-keçid məntəqələri uzun illərdən bəri tam işlək vəziyyətdə olan termoqurğularla təchiz olunub.

 

Aydın Əliyev əlavə edib ki, sərhəd-keçid məntəqələrinə DGK-nın tərkibindəki həkim briqadaları da cəlb olunublar: "Biz daimi olaraq Səhiyyə Nazirliyi ilə əməkdaşlıq edirik. Yaxın zamanlarda həmin qurumun təcrübəli həkimləri tərəfindən bizim tibb işçilərimiz üçün seminar-treninqlərin də keçirilməsi nəzərdə tutulub".