XİN: Fəxrəddin Əliyev Azərbaycanın İstanbuldakı Baş Konsulluğunda çalışmayıb
"Azərbaycanın İstanbuldakı Baş Konsulluğunda Fəxrəddin Əliyev adlı şəxs işləmir". Azərbaycan İstanbuldakı Baş Konsulluğundan APA-ya verilən məlumata görə, F.Əliyevin Konsulluğa bağlı heç bir diplomatik fəaliyyəti olmayıb.
APA-nın Türkiyə müxbirinin araşdırmasına görə, bu gün intihar etdiyi barədə xəbər yayılan F.Əliyev Türkiyədə fəaliyyət göstərən azərbaycanlı iş adamlarından biridir. O, "Farko" şirkətinin sahibidir.
F.Əliyev həmçinin Türkiyədəki Azərbaycanlı İş Adamları Birliyi qurucularından olub. Bu birlik 2012-ci ilin iyununda yaranıb.
Azərbaycan Xarici İşlər Nazirliyinin mətbuat xidmətinin rəhbəri Hikmət Hacıyev məsələyə münasibət bildirib. H.Hacıyev APA-ya açıqlamasında Fəxrəddin Əliyevin XİN sistemində çalışmadığını söyləyib.
Qeyd edək ki, bu gün Türkiyə KİV-də vaxtilə Azərbaycanın İstanbuldakı Baş Konsulluğunda çalışan və İslam Konfransı Gənclik Forumunun əməkdaşı olan diplomat Fəxrəddin Əliyevin intihar etməsi barədə xəbər yayılıb.
Məlumata görə, hadisə İstanbulun Küçükçəkməcə rayonu ərazisindəki Səfaköy silah poliqonunda baş verib. Sürücüsü ilə poliqona gedən F.Əliyev orada əvvəlcə 90 dəfə atəş açıb. Daha sonra sonuncu 10 patronunu silaha yerləşdirib və ard-arda 9 dəfə tətiyə basıb. Sonuncu gülləsini isə başına sıxıb. O, hadisə yerində dünyasını dəyişib.