Azərbaycan Mərkəzi Bankı tərəfindən lisenziyası ləğv olunmuş “Bank of Azerbaijan” ASC-nin əmanətçilərinə sığortalanmış əmanətlərin qaytarılmasına yanvarın 29-dan başlanacaq.

 

APA TV-nin məlumatına görə, bunu Əmanətlərin Sığortalanması Fondunun icraçı direktoru Azad Cavadov deyib.

 

Onun sözlərinə görə, ümumilikdə bu bankın 7 342 əmanətçisi var. İcraçı direktor deyib ki, bu əmanətçilərdən 6 599 əmanətçisinə 24 mln. manat məbləğində kompensasiya veriləcək: "Bank of Azerbaijan" fonda 36 mln. manat həcmində qorunan əmanətinin olduğu bəyan edib. Lakin məlumatlar fondda xüsusi modul əsasında hesablandıqdan sonra məlum olub ki, qorunan əmanətlərin məbləği cəmi 24 milyon manat təşkil edir. Araşdırmalar nəticəsində məlum olub ki, "Bank of Azerbaijan" öz öhdəliklərini yerinə yetirə bilmir. Buna görə bu bankın qorunan əmanətçilərinə kompensasiya veriləcək. Sığorta hadisəsi yanvarın 22-də baş verib. Qanuna görə, 7 gündən sonra kompensasiya verilməlidir".

 

A.Cavadov əlavə edib ki, qanunun tələblərinə əsasən, qorunan əmanətlərin maksimum həddi 30 min manat olduğundan, bu məbləğə malik əmanətçilərin əmanətləri agent bank tərəfindən geri qaytarılacaq: "Məsələn, bu bankda 50 min manatı olan əmanətçiyə 30 min manat fond tərəfindən qaytarılacaq, qalan 20 min manatı ləğvedici qaytaracaq".

 

Kompensasiyaların verilməsi üçün agent banklar da müəyyənləşib. Belə ki, əmanətçilərə kompensasiyalar “Muğanbank” ASC, Naxçıvanda isə “Rabitəbank” ASC-nin filialları vasitəsilə veriləcək.

 

A.Cavadov deyib ki, lisenziyası geri çağırılan digər 5 bankda sığorta hadisəsinin baş verməsi ilə bağlı hələlik fonda məktub daxil olmayıb.

 

Xatırladaq ki, ilin əvvəlindən Azərbaycanda 6 bankın - "Qafqaz İnkişaf Bankı", "Atrabank", "Gəncəbank", "Bank of Azerbaijan", "United Credit Bank" və "NBC Bank"ın lisenziyası ləğv edilib.