Bərdədə bir nəfərə məxsus 98 baş xırdabuynuzlu heyvan oğurlanıb. APA TV-nin Qarabağ  bürosunun məlumatına görə, hadisə rayonun Hacallı kəndində qeydə alınıb.

 

Kənd sakini Famil Musayevin tövləsinə girən oğrular 98 baş xırdabuynuzludan 97-ni aparıblar. Fermer hadisədən səhər saatlarında xəbər tutub. Axtarış zamanı heyvanlardan birinin cəsədi 400 metr uzaqlıqda aşkar edilib: “Mən bağladığım kimi gəlib qapını açıblar. Heyvanları çıxarandan sonra yenə qapını həminki qaydada bağlayıblar. Gecə saat 3-4 radələrində. Çünki saat 2-də mən heyvanları çıxarmışdım çölə, hamısı yerində idi. Sonra da salmışam içəri. Səhər saat 7-də gəlmişəm örüşə aparam, baxmışam ki, tövlə boşdur”.

 

Famil Musayev faktla bağlı Bərdə Rayon Polis Şöbəsinə müraciət edib. Onun hesablamalarına görə, qoyunların ümumi dəyəri 15 000 manatdır. Təsərrüfat sahibi qoyunları bankdan götürdüyü kreditlə aldığını deyir.

 

Faktla bağlı Bərdə Rayon Polis şöbəsində araşdırma aparılır.