Fövqəladə hallar naziri Kəmaləddin Heydərov bu gün Salyan şəhər ictimaiyyətinin nümayəndələri ilə görüşüb.

 

APA TV-nin Mil-Muğan bürosunun xəbərinə görə, əvvəlcə fövqəladə hallar naziri Kəmaləddin Heydərov, icra başçısı Tahir Kərimov və millət vəkilləri ulu öndər Heydər Əliyevin heykəli önünə gül dəstələri qoyaraq xatirəsini yad ediblər.

 

Salyan Şəhər İcra Hakimiyyətinin başçısı Tahir Kərimov görüşü açıq elan edərək, son illər rayonda müxtəlif sahələrdə, o cümlədən kənd təsərrüfatı sektorunda gedən inkişafdan, aparılan quruculuq işlərindən, yeni salınan körpülərdən, aralıq yollarından və bir sıra infrastruktur layihələrin həyata keçirilməsindən danışıb.

 

Nazir Kəmaləddin Heydərov bildirib ki, prezident İlham Əliyevin rəhbərliyi ilə son illər Azərbaycan iqtisadiyyatı sürətlə inkişaf edib, müxtəlif sahələri əhatə edən irimiqyaslı layihələr həyata keçirilib. O, son vaxtlar dünya bazarında xam neftin qiymətinin düşməsinin digər neft ölkələri kimi, Azərbaycanın iqtisadiyyatına da təsirsiz ötüşmədiyini qeyd edərək, prezident İlham Əliyevin son vaxtlar imzaladığı fərman və sərəncamlara diqqət çəkib: “Görülən çevik tədbirlər bir daha göstərir ki, Azərbaycan yaranan vəziyyətdən rahat çıxa bilmək üçün düzgün istiqamətdə irəliləyir”.

 

Ölkədə həyata keçirilən sosial-iqtisadi layihələrdən, ərzaq təhlükəsizliyinin təmin edilməsi istiqamətində aparılan işlər, sahibkarlığa göstərilən dövlət qayğısından danışan nazir bildirib ki, bölgələrdə keçirilən görüşlərin məqsədi də məhz prezident İlham Əliyevin tapşırığına uyğun olaraq yerlərdə vəziyyətlə, əhalinin yaşayış səviyyəsi ilə daha yaxından tanış olmaq, problemləri, yerli iş adamlarının üzləşdikləri çətinlikləri öyrənib, onların həlli istiqamətində addımlar atmaqdır.

 

“Salyan rayonunun böyük potensialı var. Rayonda kənd təsərrüfatının inkişafı istiqamətində mühüm işlər görülüb, bu işlər davam etdirilməlidir ”, - deyə K.Heydərov bildirib.

 

Nazir bildirib ki, Kür boyu su nəqliyyatının bərpa olunması, əlavə olaraq balıqçılıq təsərrüfatlarının və istixanaların yaradılması da mümkündür. O, prezidentin banklar tərəfindən bu sahələrə güzəştli kreditlərin verilməsi ilə bağlı tövsiyəsinin olduğunu da xatırladıb.

 

K.Heydərov sahibkarlara müraciət edərək, FHN-lə bağlı bütün sualları cavablandırmağa və problemləri həll etməyə hazır olduğunu qeyd edib.

 

Nazir yerli məmurların da sahibkarlara və vətəndaşlara diqqətlə yanaşmasının, onların problemləri ilə dərhal maraqlanmalarının vacibliyini vurğulayıb: "Cənab prezident dəfələrlə bunu qeyd edib. Məmurlar xalqın xidmətçisidir. Bütün məmurlar, o cümlədən yerli icra strukturları vətəndaşların, həmçinin sahibkarların müraciətlərinə dərhal və həssas münasibət göstərməlidirlər".

 

Daha sonra görüş diskussiya şəraitində davam edib.