Hollandiyanın əfsanəvi futbolçusu, 3 dəfə "Qızıl Top"un sahibi olmuş Yohan Kroyfun ötən gün  68 yaşında İspaniyanın Barselona şəhərində dünyasını dəyişdiyi məlum olub. APA TV-nin məlumatına görə,  veteran futbolçunun ölümünə səbəb ağ ciyər xərçəngi olub. Bu barədə Kroyfun saytında bildirilib.

 

Qeyd edək ki, Hollandiyanın "Ayaks", "Feyenord", İspaniyanın "Barselona", "Levante", ABŞ-ın "Los-Anceles Asteks" və "Vaşinqton Diplomats" klublarında çıxış etmiş Yohan Kroyf məşqçi kimi də çalışıb. O, "Barselona", "Ayaks" klublarına və Kataloniya yığmasına baş məşqçilik edib. Kroyf 48 oyuna 33 qol vurduğu Hollandiya millisi ilə dünya çempionatının gümüş (1974) və Avropa çempionatının bürünc (1976) medalını qazanıb. Ona futbol oynadığı müddətdə "uçan holland" deyirdilər. Kroyf holland məşqçi Rinus Mixels tərəfindən kəşf edilmiş total futbol fəlsəfəsinin əsas fiqurlarından olub.