Suriya prezidenti Bəşər Əsəd 5 ildir davam edən müharibə müddətində ölkəsinə dəyən zərərin miqdarını açıqlayıb. APA TV-nin məlumatına görə, "RİA- Novosti" müsahibəsində Əsəd Suriyaya 200 milyard dollardan çox zərər dəydiyini bildirib.

"İqtisadi cəhətdən itirdiklərimizi biz Suriyada vəziyyət stabilləşəndən sonra bəlli bir müddətdə yoluna qoya bilərik, amma dağıdılmış infrastrukturun bərpasına uzun illər lazım gələcək", - deyə o bildirib.

Bundan əvvəl Bəşər Əsəd bəyan edib ki, rəsmi Dəməşq Suriya böhranının siyasi yolla həllinə nail olunması məqsədilə keçirilən Cenevrə danışıqlarına böyük ümid bəsləyir.

Xatırladaq ki, Suriya müxalifətinin ali komitəsi hakimiyyətlə birbaşa danışıqlara hazır olduqlarını dəfələrlə bildiriblər.