Milli Məclisin deputatları və jurnalistlər Azərbaycan Hava Hücumundan Müdafiə Qoşunlarının zenit-raket briqadasında olub. Hərbi hissənin əsgər və zabitləri ilə görüşdən sonra qonaqlar Azərbaycanın Rusiyadan aldığı S300 PMU-2 Favorit zenit raket kompleksləri ilə tanış olublar. Əvvəlcə hərbi hissənin qərargahında S-300 komplekslərinin taktiki texniki göstəriciləri barədə məlumat verilib. Daha sonra əyani şəkildə raket kompleksin döyüş hazırlığına gətirilməsi nümayiş etdirilib.

APA TV-nin xəbərinə görə, hərbi hissənin imkanları barədə danışan müdafiə nazirinin müavini, Hərbi Hava Qüvvələrinin komandanı Altay Mehdiyev qeyd edib ki, S-300 raket kompleksləri sinfinin ən müasiridir. Zenit raket kompleksləri Azərbaycanın hava hücumundan müdafiə sisteminə əlavə güc qazandırır.

S-300 raketlərinin imkanları barədə məlumat verən hərbi hissə komandiri, polkovnik-leytenant Cəlil Seyfullayev bildirib ki, raketlərin məhvetmə uzaqlığı 3 kilometrdən 200 kilometrə qədərdir.

 

MAZ tipli nəqliyyat vasitələrinin şassisi üzərində yerləşdirilmiş S-300 kompleksi 5 dəqiqə ərzində döyüşə hazır vəziyyətə gətirilə bilir. Artıq istifadəçi heyət S-300 komplekslərini tam mənimsəyib. Sistemi idarə edəcək heyət üçün təlimlər təşkil olunur. Zenit-raket briqadası günün 24 saatı fasiləsiz döyüş növbətçiliyini təmin edərək Azərbaycanın hava sərhədlərini mühafizə edir.

Tanışlıq zamanı o da bildirilib ki, Azərbaycanın bütün mülki və hərbi təyyarələri «dost-düşmən tanıma» sistemi ilə təchiz olunub. Bu da ölkənin hava sahəsinə daxil olan bütün təyyarələr barədə anında məlumat əldə etməyə imkan verir.