Şirvanda sürücünün ölümü ilə nəticələnən yol-nəqliyyat hadisəsi baş verib. APA TV-nın Mil-Muğan bürosunun məlumatına görə, hadisə bu gün saat 14.30 radələrində Şirvan şəhərinin Çılpaqlı qəsəbəsində qeydə alınıb.

 

Şirvan sakini, 1962-ci il təvəllüdlü Gülasət Əbil oğlu Bağırov idarə etdiyi “Mercedes” markalı 99 FD 124 dövlət nömrə nişanlı yük avtomobilini idarə edərkən yoldan çıxaraq mağazaya çırpılıb. Nəticədə sürücü aldığı xəsarətlərdən hadisə yerində ölüb. Avtoqəza zamanı bir iribuynuzlu heyvan tələf olub, eyni zamanda magistral qaz xətti də ciddi zədələnib.

 

Faktla bağlı Şirvan Şəhər Polis Şöbəsində araşdırma aparılır.