Ağdaşda ingilis atları yetişdirilir. APA TV-nin məlumatına görə, rayonun Ərəbocağı kəndində inşa edilən atçılıq fermasında cins ingilis atlarının bəslənilməsi, təlim keçərək yarışlara hazırlanması üçün şərait yaradılıb. Hazırda atçılıq təsərrüfatında 18 baş ingilis atı bəslənilir. Atların yetişdirilməsi ilə 2 mehtər məşğuldur.

 

Bakıda cıdır yarışlarında fəaliyyətini başa vuran 5-6 yaşlı cins atlar sonradan bu kompleksə gətirilərək nəsil artırmaya cəlb olunur. Təbii yolla cütləşmə nəticəsində ingilis atlarından əldə edilən balalar iki il ərzində xüsusi rejimdə bəslənir və yarışlara hazırlanır. Daim baytar nəzarətində olan dayçalar gündə 3 dəfə yemlənir.

 

Bu günədək Ağdaş rayonundakı atçılıq kompleksində yetişdirilən gənc ingilis atlarından 7-si cıdır yarışlarına hazırlıq üçün Bakıda təşkil olunan təlimlərə göndərilib. Hazırda 3 at yarışlarda iştirak edir və onlardan biri qalib olub.

 

Atçılıq təsərrüfatında 42 baş at saxlamaq üçün tövlələr var. Hazırda kompleksin ərazisi genişləndirilir və burada 100 başadək atın yetişdirilməsi üçün işlər görülür. Ərazidə yeni ferma tikilir və atların təlim keçməsi üçün meydança salınır.