Azərbaycanda keçirilən prezident seçkilərində səsvermə səhər saat 08:00-da dövlət himninin səsləndirilməsi ilə başladı. Mərkəzi Seçki Komissiyasının sədri Məzahir Pənahov MSK-nın Seçkilər İnformasiya Mərkəzində keçirdiyi mətbuat konfransında seçkilərə hazırlıq prosesi barədə məlumat verib, hazırlığın yüksək səviyyədə aparıldığını deyib. O, seçki prosesinin Seçki Məcəlləsinə uyğun keçməsi üçün MSK-nın bütün lazımi tədbirləri gördüyünü bildirib. Seçkilərdə 10 namizəd iştirak edir. Səsvermə saat 19.00-da başa çatacaq. Ölkə üzrə 5 milyon 145 min 643 nəfər səsvermə hüququna malikdir. Seçicilər 125 seçki dairəsi üzrə 5491 seçki məntəqəsində səs verəcəklər. Seçki məntəqələrinin 5273-nün fəaliyyəti daimi, 219-nun fəaliyyəti isə müvəqqəti xarakter daşıyır.