“Azəravtoyol” Açıq Səhmdar Cəmiyyəti tərəfindən Tovuz rayonunun Qovlar-Alakol-Ağacqala-Sarıtala avtomobil yolunun tikintisinə start verilib.

 

ASC-dən APA TV-yə verilən xəbərə görə, 50 kilometr uzunluğunda mövcud avtomobil yolu 4-cü texniki dərəcəlidir, çınqıl və torpaq örtüklüdür. Layihə çərçivəsində ilkin mərhələdə yolun Əyyublu-Alakol kəndləri arasında olan 17 kilometrlik hissəsinin 3-cü texniki dərəcəyə uyğun salınması nəzərdə tutulub. Digər mərhələlərdə yolun qalan hissələrinin tikintisi aparılacaq.

 

Layihə çərçivəsində tikintisi aparılan 2 hərəkət zolaqlı yolun torpaq yatağının eni 12 metr, bərkidici zolaq da daxil hərəkət hissəsinin eni 8 metr, hər iki istiqamət üzrə çiyinlərin eni 2 metr olacaq. 17 km-lik hissəyə 2 qat olmaqla 135 min kv. m yüksək keyfiyyətli asfalt-beton örtüyünün döşənməsi planlaşdırılır.

 

Aparılan tikinti işləri zamanı Zəyəmçay üzərində yerləşən körpü də əsaslı təmir olunacaq. Sözügedən körpünün uzunluğu 74 paqon-metr, eni 11 metrdir. Əsaslı təmir zamanı körpüdə hər iki istiqamət üzrə 1 metr enində piyada səkiləri yaradılacaq, körpünün kənarlarına 148 paqon-metr məhəccərlər quraşdırılacaq, vətəndaşların təhlükəsizliyini təmin etmək məqsədilə səki ilə yolun hərəkət hissəsi arasında 148 paqon-metr təkərqaytaranlar quraşdırılacaq.

 

Bundan başqa, tikinti işlərinin aparıldığı 17 kilometrlik hissədə 16 yeni suötürücü boru tikiləcək, əkin sahələrinə suların ötürülməsi üçün avtomobil yolunun altından 46 yerdə borular qoyulacaq.

 

Hazırda layihəyə uyğun olaraq torpaq işləri görülür, yol 1 metr dərinlikdə qazılır və yol yatağı ilə yol əsasının tikintisi işləri aparılır.

 

Bu avtomobil yolunun tikintisi ilə 16 yaşayış məntəqəsinin 50 min nəfərə yaxın əhalisinin gediş-gəlişi xeyli asanlaşacaq, bölgənin turizm potensialının artmasına və kənd təsərrüfatının inkişafına gətirib çıxaracaq.