“Azəravtoyol” ASC tərəfindən Şabran rayonun Qalaaltı kəndi istiqamətində yeni yol çəkilir.

APA TV-nin xəbərinə görə, yeni yol Bakı-Quba-Rusiya Federasiyası ilə dövlət sərhədi avtomobil yolunun 115-ci km-dən Qalaaltı kəndinə doğru salınır.

Uzunluğu 14,4 kilometr olan yol yatağının eni 15, 20,5 və 23 metr olacaq. Hərəkət zolaqlarının eni 3,75 metr, ayrıcı zolağın eni isə 1 m və 3,5 metr olacaq.

Layihə çərçivəsində 4 ədəd yol ötürücüsünün tikintisi nəzərdə tutulub. Bundan başqa, 2 ədəd  düzbucaqlı dəmir-beton su keçidləri, həmçinin 9 ədəd dairəvi dəmir-beton suötürücü boruların tikintisi də nəzərdə tutulub.

Hazırda yolun 1-4 km-lik hissəsində torpaq yatağı tikilir. Bakı-Quba-Rusiya Federasiyası ilə dövlət sərhədi avtomobil yolunun 115-ci km-də yol qovşağı və yolun başlanğıcında yerləşən mövcud su kəməri üzərində yol ötürücüsündə tikinti işləri 70-75 faiz icra olunaraq yekunlaşdırılıb. Yolun 6,9-cu km-də yerləşən mövcud Şimal İxrac Neft Boru Kəməri üzərindəki yol ötürücüsündə isə svayların beton işləri görülür.

Qeyd edək ki, sözügedən yolun salınması həmin ərazidə turizmin və kənd təsərrüfatının inkişafına, yeni turizm marşrutlarının yaranmasına gətirib çıxaracaq.