“Gəncə Qənnadı” ASC-nin binasında yanğın baş verib. APA TV-nin qərb bürosunun verdiyi məlumata görə, yanğın 5 mərtəbəli binanın 3-cü mərtəbəsində yerləşən anbarda qeydə alınıb.

 

Otağa yığılan tullantı plastik kütlələrin alışması nəticəsində 50 kvadratmetr sahə yanaraq yararsız hala düşüb. Hadisə yerinə Gəncə şəhər Dövlət Yanğından Mühafizə İdarəsinin 6 yanğınsöndürən maşını və canlı qüvvəsi cəlb edilib.

 

Tez bir zamanda alov söndürülüb və onun başqa otaqlara keçməsinin qarşısı alınıb. İlkin ehtimala görə, yanğın elektrik naqillərində yaranan qısaqapanma nəticəsində baş verib.

 

Qeyd edək ki, iki il öncə də “Gəncə Qənnadı” ASC-nin inzibati binasında yanğın qeydə alınmışdı.