Təmsil olunduğu Respublikaçılar Partiyasında daxili müxalifətlə üzləşən Donald Tramp ABŞ prezidentliyinə namizəd olmaq üçün lazım olan 238 səsi təmin edib.

 

APA TV-nin "Euronews"a istinadən məlumatına görə, respublikaçılar iyunun 7-də 6 ştatda son praymerizlərini keçirdikdən sonra marafonu tamamlayacaq. Həmin 6 ştatda daha 303 səsin olduğu bildirilir.

Milyarderin bu səsləri də qazanacağı istisna edilmir. Ölkədə Tramp əleyhinə aksiyalar davam edərkən, media nümayəndələri Nyu-Yorkdakı "Trump Tower"-in önündə insanlardan onun apardığı kampaniya barədə nə düşündükləri ilə maraqlanır.

Tramp tərəfdarlarından biri namizədin onların səsi olduğunu qeyd edib: "Hazırda yüksək postlarda oturan şəxsləri oradan uzaqlaşdırmaq və ölkəni əsl sahiblərinə qaytarmaq lazımdır. Donald Tramp bunu bacara biləcək şəxsdir".

Milyarderi irqçilikdə qınayanlar da var. "Amerikanın bu vəziyyətə gəlməsindən çox üzgünəm", - deyə başqa bir vətəndaş bildirib.

Demokratların cəbhəsində isə vahid namizəd olmaq üçün 2 383 səs toplamaq lazımdır. Hazırda lider Hillari Klinton bu səslərin 2 305-ni, Sanders isə 539-nu yığa bilib. Demokratlar partiyası 14 iyunda beş ştatda praymerizlər keçirəcək və orada qalan 930 səs Klintonla Sanders arasında sahiblərini tapacaq.