Türkiyədə növbəti terror aktı baş verib. Mardin vilayətinin Midyat qəsəbəsində Polis İdarəsinin qarşısında bomba yüklənmiş avtomobil partladılıb. Daha sonra partlayışı törədən terrorçularla polislər arasında atışma baş verib. Hadisə yerinə çoxlu sayda polis və təcili yardım cəlb olunub. Ətrafda yerləşən dövlət orqanlarının binalarına ciddi ziyan dəyib. Terror aktını PKK terror təşkilatının törətdiyi güman edilir.

 

İlkin məlumata görə, terror aktı zamanı iki polis əməkdaşı şəhid olub, 20-dən çox şəxs yaralanıb. Yaralıların əksəriyyəti mülki şəxslərdir. Onların əksəriyyətinin vəziyyəti ağırdır.

 

Qeyd edək ki, ötən gün İstanbul Vəznəçilər bölgəsində də terror aktı törədilib. Terror aktı nəticəsində 12 nəfər ölüb, 35 nəfər yaralanıb.