Gürcüstan hökuməti Səudiyyə Ərəbistanı ilə yeni silah anlaşmasına imza atıb. APA TV-nin Rusiya mətbuatına istinadən xəbərinə görə, müqavilənin dəyəri 32 milyon dollardır.

Sənəd bu ilin mart ayında imzalanıb. Müqavilənin şərtlərinə əsasən iyun ayından başlayaraq, Gürcüstan Səudiyyə Ərəbistanına döyüş modullarının birinci hissəsini göndərməyə başlayacaq.

Səudiyyə Ərəbistanının artıq bir ildir ki, Yəməndə hərbi əməliyyatlar apardığını nəzərə alaraq, hərbi modulların artıq yaxın vaxtlarda ölkəyə göndəriləcəyini proqnozlaşdırmaq mümkündür. Haqqında bəhs olunan müqavilə "Delta" Korporasiyasının Səudiyyə hökuməti ilə imzaladığı sayca ikinci razılaşmadır. İlk sənədin dəyəri isə 40 milyon dollar təşkil edib.