Moskvada yerli sakin Yeqor Şerbakovun qətlində şübhəli bilinən Azərbaycan vətəndaşı Orxan Zeynalov Moskvaətrafı vilayətinin Kolomna şəhərində saxlanılıb. O, polis helikopteri ilə Moskvaya aparılıb. Helikopter "Petrovka 38" kimi tanınan istintaq təcridxanasına enib.

 

Orxan Zeynalovu Rusiyanın daxili işlər naziri Vladimir Kolokoltsevin yanına aparıblar.

 

APA TV xəbər verir ki, nazir Orxan Zeynalovun saxlanılmasında iştirak edən əməliyyatçılara təşəkkür edib. O bəyan edib ki, xüsusi təyinatlı dəstənin həmin əməkdaşları mükafatlandırılacaqlar.

 

Hüquq-mühafizə orqanldarının əməkdaşları şübhəlinin şəxsiyyətini müəyyənləşdirəndən dərhal sonra xüsusi əməliyyata başlayıblar. Məlumata görə, Orxan Zeynalov saxlanılarkən müqavimət göstərib.

 

Rusiya telekanallarının yaydığı görüntülərdə Orxan Zeynalov helikopterdə üzü üstdə döşəməyə uzadılır.

 

Onun izinə düşməkdə hüquq-mühafizə orqanı əməkdaşlarına qonşuları kömək ediblər. Onlar müşahidə kamerası görüntülərindən Orxan Zeynalovu tanıdıqlarını bildiriblər. Orxan Zeynalovla eyni mənzildə yaşayanlar bildiriblər ki, Yeqor Şerbakov qətlə yetirilən gecənin səhəri Orxan Zeynalov evə  gələrkən özündə olmayıb. Qonşulardan birinin sözlərinə görə, onlar yayılan videodakı şəxsin o, olduğunu deyəndə Orxan Zeynalov evi tərk edib.

 

Məlumata görə, Orxan Zeynalov hansısa qızla mübahisə edib və qəzəbini ətrafdan keçənlərdən çıxarmaq istəyib. Amma bu versiya hələ təsdiqlənməyib.

 

Orxan Zeynalov 48 saat müddətinə saxlanılıb. O, dindirildikdən sonra məhkəmə qarşısına çıxarılacaq.

 

Bu arada isə Moskvadakı Pokrov bazarının bağlanması barədə qərar qətiləşib.

 

Xatırladaq ki, oktyabrın 10-una keçən gecə Rusiyanın Qəbi Birulyov rayonunda 25 yaşlı Yeqor Şerbakov qətlə yetirilib. Naməlum şəxs bıçaqla onun ürəyindən vurub. Oktyabrın 13-də Moskvada qatilin cəzalandırılması tələbi ilə keçirilən aksiya kütləvi iğtişaşlara və miqrantlara qarşı hücumlara çevrilib. İğtişaşlar zamanı 400-ə yaxın adam saxlanılıb.