Amerikalı milyarder Corc Soros İngiltərədə keçirilən referendumdan qazanclı çıxıb.

 

APA TV-nin Rusiya mətbuatına istinadən məlumatına görə, yaxın ətrafı milyarderin funt əleyhinə kapital qoyuluşlarından deyil, digər investisiyalardan qazandığını açıqlayıb.

 

C. Sorosun külli-miqdarda qazanmasına səbəb isə referendum nəticəsində bahalaşan qızıl aktivlərinə sərmayə yatırması olub.

 

Hazırda Corc Soros 24 milyardlıq sərvəti ilə dünyanın zəngin insanları arasında 23-cü yeri tutur. 

 

Corc Soros referendumdan iki gün öncə "The Guardian" qəzetində xüsusi yazı ilə çıxış edib.

 

Yazısında o, britaniyalıların krallığın Avropa İttifaqını tərk etməyin lehinə səs verəcəyi təqdirdə funt-sterlinqin 20 faiz dəyər itirəcəyini proqnozlaşdırıb.

 

O, eyni zamanda bu halın 1992-ci ildəki 15 faizlik azalmadan daha faciəvi olacağını qeyd edib.

Tarixə adını "qara çərşənbə" olaraq yazdıran həmin gün də C. Soros dəyər itirən funt üzərində seçim etməklə, öz sərvətini artırıb.