Avro-2016-nın növbəti mərhələsinə yekun vurulub. APA TV-nin məlumatına görə,  Parisin “Stad de Frans” stadionunda turnirin  sonuncu 1/4 final matçı baş tutub. Dördüncü  yarımfinalçını müəyyən etmək üçün Fransa millisi ilə İslandiya qarşılaşıb. Matç Fransa yığmasının böyük hesablı qələbəsi ilə başa çatıb – 5:2.

 

Oyunda hesabı Fransa yığması açıb. 12-ci dәqiqәdә Oliviye Jiru komandasını hesabda önə keçirib.

 

8 dəqiqə sonra, Fransa yığması aradakı top fərqini ikiyə çıxarıb. Qolun müəllifi 20-ci dəqiqədə Pol Poqba olub.

 

Olduqca aktiv oyun nümayiş etdirən Fransa yığması Dmitri Payenin  43-cü dəqiqədə atdığı qolla fərqi 3-ə çatdırıb.

 

Birinci hissənin sonlarına yaxın Antuan Qrizman Fransa yığmasının 4-cü qolunu vurub və birinci hisə 4:0 Fransa yığmasının üstünlüyü ilə bitib.

 

İkinci hissəyə sürətlə başlayan İslandiya yığması nəhayət 56-cı dəqiqədə ilk qolunu vurub. Qolun müəllifi Siqtresson olub.

3 dəqiqə sonra Fransa 5-ci qolu vurub. Oliviye Jiru 59-cu dəqiqədə fərqlənib - 5:1.

 

İslandiya yenidən fərqi azaldıb. 84-cü dəqiqədə Byarnason fərqlənib - 5:2.

 

 

Matçda başqa qol olmayıb və beləliklə,  Fransa  ½  final mərhələsinə vəsiqə qazanıb.  Didye Deşamın yetirmələri yarımfinal matçında Almaniya  yığması ilə görüşəcək. Oyun iyulun 7-də, Marsel şəhərində keçiriləcək.