Lənkəranda ölümlə nəticələnən  yol-nəqliyyat qəzası baş verib. APA TV-nin cənub bürosunun məlumatına görə, hadisə oktyabrın 18-də Lənkəran-Boradigah şose yolunun rayonun Separadi kəndindən keçən hissəsində qeydə alınıb. Lənkəran rayonunun Tükəvilə kənd sakini, 45 yaşlı Seyran Aslan oğlu Mirzəyevin idarə etdiyi “Muravey” markalı motosiklet rayonun Cil kənd sakini, 23 yaşlı Ramiz Tahir oğlu Tağızadənin idarə etdiyi 42 BP 664 dövlət nömrə nişanlı “KamAZ” markalı yük avtomobilinin altına girib. Nəticədə çoxsaylı bədən xəsarətləri alan motosikletin sürücü hadisə yerində ölüb. Faktla bağlı Lənkəran Şəhər-Rayon Polis Şöbəsində araşdırma aparılır.