Türkiyədə 15 iyul hərbi çevriliş cəhdindən sonra dövlət idarələrində başlayan kütləvi təmizləmələrə Xarici İşlər Nazirliyi də qoşulub.

 

APA TV-nin Türkiyə mənbələrinə istinadən verdiyi xəbərə görə, nazir Mövlud Çavuşoğlunun rəhbərliyi ilə aparılan araşdırmaların nəticəsində ilk olaraq səfir rütbəsinə malik 4 diplomat XİN sistemindən qovulub.

 

Onların arasında Türkiyənin Kanadadakı sabiq səfiri Tuncay Babalı və keçmiş prezident Abdulla Gül ilə sabiq baş nazir Əhməd Davudoğlunun müşaviri olmuş Gürcan Balık da var. G.Balık Ə. Davudoğlu xarici işlər naziri olarkən onu ABŞ-da Fətullah Gülənlə görüşdürüb.

 

Səfirlərlə birlikdə 2-ci katib rütbəsində və daha aşağı səviyyəli onlarla diplomatın da sistemdən xaric edildiyi bildirilir.
 

Bu arada eyni ittihamla ölkənin Dini İşlər İdarəsində ikinci dəfə "təmizləmə" əməliyyatına start verilib. Ümumilikdə, 1112 nəfər işdən kənarlaşdırılıb.