Amerikalı skaydayver Lyuk Eykins tarixdə ilkə imza atıb. O, 7,6 km hündürlükdən paraşütsüz tullanıb.

 

APA TV-nin xəbərinə görə, 42 yaşlı skaydayver 20 mərtəbə hündürlüyündə, tikinti kranları arasında quraşdırılmış tora uğurlu eniş edib.

 

Enişdən dərhal sonra o, həyat yoldaşı və əzizlərini qucaqlayıb. “Mənə elə gəlirdi ki, uçuram. Bunun baş verməsi inanılmazdır” - deyə Lyuk deyib.

 

Havada ikən onun sürəti 200 km/s olub. İlk iki dəqiqədə Lyuku kameralı və oksigen ehtiyatı olan paraşütçülər müşayiət edib. O, bu rekord üçün yarım il hazırlıq görüb.

 

Qeyd edək ki, Lyuk Eykins peşəkar paraşütçüdür. Bu fəaliyyətə o, hələ yeniyetmə ikən başlayıb. Lyuk indiyə kimi 18 min dəfə tullanış edib.