Abşeron rayon sakini 37 yaşlı Şahin Qəhrəmanov istirahətdə olarkən tutulub. APA TV-nin məlumatına görə, saxlanılan şəxs Nabranda olarkən restoranların birində bir nəfərlə tanış olub. Yeyib-içən şəxslərin kefləri kök olduğundan, tərəflər arasında səmimiyyət yaranmağa başlayıb. Bu zaman Şahinin tanımadığı şəxs ona narkotik vasitə təklif edib. Sərxoş Şahin təklifi qəbul edib. Daha sonra sözügedən şəxs Şahinə “İstəsən, sənə yenə narkotik vasitə tapa bilərəm” deyib. Razılıq verən Şahin həmin şəxslə görüşüb. Narkotik vasitəni götürüb Bakıya qayıdan Şahin Qəhrəmanov Xırdalana gəlib. Özünün dediyinə görə, maşını xarab olduğundan, onu təmir etmək üçün maşınına baxış keçirib. Elə bu zaman Abşeron rayon Polis İdarəsinin əməliyyatçıları onu tutaraq idarəyə gətiriblər.

 

Faktla bağlı Abşeron Rayon Polis İdarəsində cinayət işi başlanıb, araşdırma aparılır.