Türkiyə Silahlı Qüvvələri Baş Qərargahının ədliyyə müşaviri, general-mayor Dinçer Ural Fəthullahçı Terror Təşkilatına üzv olması iddiası ilə həbs edilib. APA TV-nin məlumatına görə, Dinçer Ural bu vəzifəyə 15 iyul hadisələrindən sonra təyin olunmuşdu. O, ədliyyə müşaviri postunda silahlı çevriliş cəhdinin rəhbərlərindən polkovnik Muharrem Kösenin yerinə təyin olunmuşdu. Ural Dinçer buna qədər 1-ci ordu komandanlığında hərbi prokuror olub, Ali Hərbi Şuranın son iclasında rütbəsi artırılıb və general-mayor rütbəsi ilə Baş Qərargaha ədliyyə müşaviri təyin edilib. FETÖ ilə sıx əlaqələri olan yeni ədliyyə müşavirinin dünən axşam Ankarada həbs edildiyi, Mütəşəkkil Cinayətkarlıqla Mübarizə İdarəsinə aparıldığı bildirilir.