Bakının Binəqədi qəsəbəsində qətlin təfərrüatları  bəlli olub. APA TV-nın məlumatına görə, hadisə qəsəbə sakini Əfsanə Məmmədovanın evində baş verib. Dörd ay əvvəl Əfsanə Məmmədova Gədəbəy rayon sakini Fidani İsmayılov ilə tanış olub. Dünən onların arasında mübahisə yaranıb. Mübahisəyə səbəb qadının qardaşı ilə onun icazəsi olmadan dənizə getməsi olub. Qızın evinə gələn Fidani qapının bağlı olduğunu görüb əsəbiləşib.

 

"Mənə demədən dənizə getmişdilər. Mən də gəldim qolundan bıçaqla vurdum. Yox, qısqanmamışdım, sadəcə əsəbiləşdim".

 

Bacısını qan içində görən 15 yaşlı Anar Məmmədov  Fidaninin üstünə cumur. Bu zaman Fidani bir bıçaq da ona vurur. Səsə çıxan qonşular dərhal təcili tibbi yardıma və polisə zəng vururlar. Hər iki zərərçəkən xəstəxanaya aparılsa da, 15  yaşlı Anarın həyatını xilas etmək mümkün olmur.

Faktla bağlı  Binəqədi rayon prokurorluğunda qəsdən adamöldürmə maddəsi ilə cinayət işi başlanıb, araşdırma aparılır.  Qeyd edək ki, qətli törədən Fidanı İsmayılov ailəlidir, himayəsində iki azyaşlı övladı var.