Cerablusun İŞİD terrorçularından azad edilməsindən 48 saat sonra İran Xarici İşlər Nazirliyi məsələyə münasibət bildirib.

APA TV-nin məlumatına görə, rəsmi Tehranın münasibəti Rusiya Xarici İşlər Nazirliyinin münasibətindən fərqlənməyib. İranın xarici siyasət idarəsinin sözçüsü Behram Kasımi açıqlamasında bildirib ki, Ankara Suriya ərazisində hərbi əməliyyatları Dəməşqlə koordinasiya olunmuş şəkildə aparmalıdır. Xatırladaq ki, analoji bəyanatla Rusiya XİN-in sözçüsü Mariya Zaxarova da çıxış etmişdi.

Rusiya, İran və Suriya rəsmi dairələrinin Cerablus əməliyyatına ehtiyatlı yanaşması bu əməliyyatın adı çəkilən ölkələrlə razılaşdırılmış şəkildə aparıldığı ehtimalını gücləndirir.