Cəlilabadda ilansancma hadisəsi baş verib. APA TV-nin cənub bürosunun məlumatına görə, hadisə rayonun Qarağac kəndi ərazisində qeydə alınıb.

 

Kənd sakini, 25 yaşlı Məntiq İsbarov örüş sahəsində təsərrüfat işləri görərkən ilan onun sol ayağının pəncə nahiyəsindən sancıb.

 

Hadisədən dərhal sonra Məntiqin ayaqları keyləşib. Ətrafda heç kimin olmadığını görən zərərçəkmiş bir neçə yüz metrlik ərazini sürünməklə yola çıxıb və elə oradaca huşunu itirib. Yoldan keçən sürücülərdən biri onu Cəlilabad Mərkəzi Rayon Xəstəxanasına çatdırıb. Burada ona zəhər əleyhinə zərdab vurulub, digər zəruri tibbi yardımlar göstərilib.

 

Qeyd edək ki, bir neçə il öncə də Məntiq İsbarovu ilan sancıb.