Bakıda ağır zəncirvarı yol qəzası baş verib, 4 nəfər xəsarət alıb. APA TV-nin məlumatına görə, hadisə Fətəli xan Xoyski və Əhməd Rəcəbli küçələrinin kəsişməsində baş verib.

 

İki küçənin kəsişməsində “Jeep”, "VAZ 2107" və iki “Mercedes” markalı avtomobillər toqquşub. Qəza nəticəsində avtomobillərdə olan 4 nəfər xəsarət alıb. 1 saylı Şəhər Kliniki Xəstəxanasından APA TV-yə verilən məlumata görə, ora qəza zamanı xəsarət alan iki nəfər aparılıb. Bunlar Ruqiyyə Dadaşova və Nicat Ağamalıyevdir. Digər iki yaralı isə özəl xəstəxanalara aparılıb.

 

İlkin məlumata görə, qəzaya Əhməd Rəcəbli küçəsindəki işıqforun işləməməsi və sürücülərin buna əhəmiyyət verməməsi səbəb olub. İşıqforun Bakıya yağan və fəsadlar yaradan güclü yağışdan sonra işləmədiyi bildirilir. Sürücülər bir həftədir Fətəli xan Xoyski və Əhməd Rəcəbli küçələrinin kəsişməsini qəza qorxusu ilə keçdiklərini iddia edirlər.

 

Nərimanov Rayon Dövlət Yol Polisi İdarəsinin hadisə yerində müayinələr aparan inspektoru Emin Əmrahov isə deyir ki, işıqfordakı problem hava şəraiti ilə əlaqədar yaranıb və bir həftədir davam etdiyi barədə iddialar əsassızdır.

 

Faktla bağlı Nərimanov Rayon Polis İdarəsində araşdırma aparılır.