Türkiyə Silahlı Qüvvələrinin Suriyanın şimalında həyata keçirdiyi "Fərat qalxanı" əməliyyatının 120-ci günündə İŞİD hərbçilərə hücum edib.

APA TV-nin Türkiyə mətbuatına istinadən verdiyi məlumata görə, İŞİD Əl Bab qəsəbəsi yaxınlığında hərbçilərin səhra xəstəxanasının yerləşdiyi ərazini atəşə tutub.

Baş verən atışmada xeyli sayda terrorçunun məhv edildiyi deyilir. Türk ordusunun da 3 şəhid verdiyi bildirilir, 11 əsgər isə yaralanıb. Hazırda şəhid əsgərlər və yaralılar Türkiyə sərhədinə aparılır, amma hava şəraitinin əlverişsiz olması səbəbindən gecikmə olduğu vurğulanır. Onları Kilis və Qaziantepdəki xəstəxanalara çatdırmaq üçün bölgəyə helikopterlər də cəlb olunub.