Son bir ayda intensiv olaraq yağan yağış və qardan sonra Şamaxı şəhərində və kəndlərdə torpaq sürüşməsi yenidən aktivləşərək geniş ərazini əhatə edib və ciddi fəsadlara səbəb olub.

 

APA TV-nin yerli bürosunun xəbərinə görə, son vaxtlar şəhərin Hüseyn Ciddi küçəsində və Şəhidlər Xiyabanı ətrafında sürüşmə sahəsi daha da genişlənib.

 

Bu günlərdə 30-dan çox evdə çatlar əmələ gəlib. Torpaq sürüşməsi zamanı vətəndaşlara məxsus daha 4 fərdi evin divarlarında iri çatlar əmələ gəldiyi üçün yaşayış üçün təhlükəli vəziyyət yaranıb.

 

Şamaxı Rayon İcra Hakimiyyətinin nümayəndəsi Şahnəzər Qasımov APA TV-yə bildirib ki, şəhərin şimal-şərq hissəsində hazırda 10-dan çox ev qəzalı vəziyyətdədir. Mənzillərin divarlarında iri çatlar əmələ gəlib. Evlər hər an sürüşmə zamanı dağıla bilər. Sakinlərə məxsus meyvə bağlarında çoxsaylı torpaq batmaları baş verib. Son günlər qarın yağmasından sonra yenidən aktivləşən sürüşmə hər gün davam edir.

 

Şahnəzər Qasımovun sözlərinə görə, torpaq sürüşməsi nəticəsində indiyədək rayonun 7 kəndində, Çabanı, Mədrəsə, Meysəri, Birinci Çaylı, Muğanlı, Acıdərə və Qaleybuğurd yaşayış məntəqəsində qəzalı vəziyyətə düşən 404 ev var. Bu evlərdən 84-ü bu il baş verən torpaq sürüşməsi zamanı ziyan çəkib, divarlarda çatlar əmələ gəlib, həyətlərdə torpaq sürüşməsi və çökməsi baş verib, yarğanlar əmələ gəlib. İndiyədək 19 qəzalı evdə yaşayan ailə təhlükəsiz əraziyə keçirilib. Təkcə Mədrəsə qəsəbəsində qəzalı evlərin sayı 20-dən çoxdur və sürüşmə ərazisi son iki ayda 20 hektar genişlənərək 40 hektara çatıb. Ümumilikdə isə 100-dən dən çox evdə irili-xırdalı çatlar əmələ gəlib. Üç ev yararsız hala düşdüyündən, sakinlər kompensasiya alaraq evlərini tərk ediblər.

 

Məsələ ilə bağlı Ekologiya və Təbii Sərvətlər Nazirliyinin, Fövqəladə Hallar Nazirliyinin və Şamaxı Rayon İcra Hakimiyyətinin nümayəndələri sürüşmə zonalarına baxış keçirərək sakinlərlə görüşüblər. Son günlər yağan qardan sonra Şamaxıda aktivləşən torpaq sürüşməsinin fəsadları və evlərə dəyən ziyan barədə rayon fövqəladə hallar komissiyası tərəfindən aidiyyəti qurumlara məlumat verilib.