NATO-ya üzv ölkələrin xarici işlər nazirləri aprelin əvvəllərində Brüsseldə toplanacaq. APA TV-nin Türkiyə mətbuatına istinadən məlumatına görə, ABŞ dövlət katibi Reks Tillerson bu toplantıya qatılmayacaq.

Buna səbəb Çin dövlət başçısının həmin tarixlərdə ABŞ-a gözlənilən səfəri ilə əlaqədardır.

Çin rəhbərinin ABŞ prezidenti Donald Trampla görüşünün Floridada baş tutacağı deyilir.

Tillerson isə bu görüşlərdən sonra Rusiyaya gedəcək.

Ekspertlər dövlət katibinin NATO tədbirinə qatılmamasını Trampın əks-cəbhədə olan böyük dövlətlərlə münasibətlərə daha çox önəm verməsi kimi qiymətləndirir.

Ehtimal olunur ki, ABŞ bu addımı ilə müttəfiqlərinə "bizə möhtacsıznız" mesajını vermək istəyir. 

NATO xarici işlər nazirlərinin tədbirində ABŞ-ı Tillersonun köməkçisi Tom Şannon təmsil edəcək.