“Azərbaycan və Ermənistan arasında yüksək səviyyədə dialoq tərəflər arasında etimad və qarşılıqlı anlaşmanın möhkəmlənməsinə tövhə verəcək və Dağlıq Qarabağ münaqişəsinin nizamlanması üzrə danışıqlar prosesinə müsbət stimul verəcək”.

 

Bu sözlər ATƏT-in fəaliyyətdə olan sədri, Ukraynanın xarici işlər naziri Leonid Kojaranın Azərbaycan və Ermənistan prezidentlərinin görüşünə dair verdiyi bəyanatında yer alıb. O qeyd edib ki, bu cür danışıqlar sülhə və sabitliyə zəmanət verir və regional əməkdaşlıq üçün yeni imkanlar açır. 

 

APA TV-nin xəbərinə görə, bəyanatda həmçinin qeyd olunub ki, Ukrayna ATƏT-nin sədri olaraq ATƏT-in Minsk Qrupunun həmsədrlərinin vasitəçiliyi ilə Azərbaycan və Ermənistanın Dağlıq Qarabağ münaqişəsinin beynəlxalq hüquq əsasında tam nizamlanmasına yönəlmiş müntəzəm dialoqun qurulması üzrə səylərini  dəstəkləməyə hazırdır.

 

Noyabrın 19-da Vyanada Azərbaycan və Ermənistan prezidentləri arasında görüş keçirilib. İki ölkənin prezidentləri iki illik fasilədən sonra bir araya gəliblər.