Azərbaycan prezidenti İlham Əliyev Hindistan Respublikasının xarici işlər üzrə dövlət naziri Mobaşar Caved Akbarın başçılıq etdiyi nümayəndə heyətini qəbul edib.

 

APA TV-in mlumatına görə, Azərbaycana səfərindən böyük məmnunluq hissi keçirdiyini vurğulayan Hindistanın xarici işlər üzrə dövlət naziri Mobaşar Caved Akbar Azərbaycan xalqının ümummilli lideri Heydər Əliyevin və İlham Əliyevin rəhbərliyi ilə ölkəmizdə əldə edilən sabitlik və inkişafla bağlı Hindistanın baş naziri, rəhbərliyi və xalqı adından dövlət başçısını təbrik edib.

 

Xoş sözlərə görə minnətdarlığını bildirən prezident İlham Əliyev Azərbaycanın müstəqillik illərində böyük uğurlar əldə etdiyini, sabit və sürətlə inkişaf edən ölkəyə çevrildiyini vurğulayıb.

 

Dövlət başçısı Hindistan Respublikasının xarici işlər üzrə dövlət naziri Mobaşar Caved Akbarın ölkəmizə bu səfərinin ikitərəfli münasibətlərimizin perspektivlərinin müzakirə edilməsi üçün yaxşı imkan yaratdığını deyib.

 

Söhbət zamanı "Asiyanın Qəlbi - İstanbul Prosesi" çərçivəsində Bakıda keçiriləcək Nazirlər Konfransının regional əməkdaşlığın gücləndirilməsi, Əfqanıstana beynəlxalq səviyyədə göstərilən dəstəyin artırılması baxımından önəmi qeyd edilib.